2 Raja-raja 20
Allo iato masanna’mi sakinna tu Hizkia, la mate mannamo; saemi nabi Yesaya, anakna Amos, mennolo lako datu, anna ma’kada nakua: Inde sia tu kadanNa PUANG: Mepasanmokomi lako mintu’ to lan tongkonan layukmi, belanna la matekomi sia tae’mo mila tuo.
Messailemi tu datu lako to’rinding, namassambayang lako PUANG,
nakua: O PUANG, la Mikilalai umba kukua lolang maruru’ dio oloMi sia lantuk penaangku sia kupogau’ tu apa melo dio pentiroMi. Pakalan si’dan-si’danmi tumangi’ tu Hizkia.
Tae’pa natassu’ tu Yesaya lan mai tarampak tangnga, pakalan saemi tu kadanNa PUANG lako kalena, Nakua:
Tibalikko sule sia pokadanni Hizkia, arungna taungKu, kumua: Inde sia tu kadanNa PUANG, Kapenombanna Daud, nene’ to dolomi, nakua: Kurangimo tu passambayangmu sia Kutiromo tu mintu’ uai matammu; manassa la Kupamondoko, anna allo ma’pentallun mumale langngan banuanNa PUANG.
La Kurangngannipa tu kadadiammu sangpulo lima taunna, sia la Kulendokangko sola te kota iate lan mai kuasanna datu Asyur sia la Kurinding pala’ te kota iate, belanna sangangKu sia belanna Daud, taungKu.
Ma’kadami Yesaya nakua: Alakomi bua ara petamba’. Naalami anna palakoi tu bundang iato, namondo.
Mekutanami Hizkia lako Yesaya nakua: Apara tandana kumua la Napamondona’ PUANG sia la malena’ langngan banuanNa PUANG, ke allo ma’pentallun?
Mebalimi Yesaya nakua: Iamote tu la dadi tanda lako kalemi dio mai PUANG, kumua PUANG la umpogau’i tu apa mangka Napokada. La maleraka sangpulo pellesean tu bayo-bayo lako tingayo, ba’tu la sorong boko’raka sangpulo pellesean?
Nakuami tu Hizkia: Maraa tu bayo-bayo male rokko sangpulo pellesean; tae’ nasusito, sangadinna la sorong boko’ tu bayo-bayo sangpulo pellesean.
Metambami tu nabi Yesaya lako PUANG, Nakondorammi sule sangpulo pellesean tu bayo-bayo solo’mo dio pellesean eranna Ahas.
Attu iato nasuami Merodakh-Baladan, anakna Baladan, datu Babel, tu sumbungan puduk la umbaa sura’ sia pamengan lako Hizkia, belanna napekarebamo, kumua masakimo tu datu.
Natammuimi Hizkia tu sumbungan puduk iato, anna patiroanni tu banua pangnannan iananna, iamotu mintu’ salaka sia bulaan sia rampa-rampa sia minna’ keangga’ sia mintu’ inan pa’bunona sia mintu’ lan inan pangnannan iananna. La iatu lanna tongkonan layukna, la iatu lanna mintu’ parentana, moi misa’ tae’ tang napatiroan Hizkia lako tau iato mai.
Attu iato saemi nabi Yesaya mennolo lako datu Hizkia, anna mekutana lako datu, nakua: Apara napokada tu tau iato mai sia umbara nanii sae ussitiroan puangku? Mebalimi Hizkia nakua: Iatu tau iato sae lako kaleku lu dio mai tondok mambela, iamotu Babel.
Mekutanami Yesaya nakua: Apara natiro lan tongkonan layukmi? Mebalimi Hizkia nakua: Mintu’ apa lan tongkonan layukku natiro nasangmo tau iato mai; moi misa’ tu lanna inan pangnannan iananku, tae’ tang kupatiroanni
Ma’kadami Yesaya lako Hizkia nakua: Perangii tu kadanNa PUANG:
Manassa la sae tu allona, namintu’ tu apa lan tongkonan layukmu sia apa narampun nene’ to dolomu sae lako allo iate, la dibaa lako Babel. Moi misa’ tae’mo la torro, kadanNa PUANG.
Sia la naala tau iato mai tu ba’tu pira-pira anakmu muane, tu dadi dio mai kalemu sia tu mudadian, anna angka’i to mase’ponna datu lan tongkonan layukna datu Babel.
Ma’kadami Hizkia lako Yesaya nakua: Melo tu kadanNa PUANG tu mipokada. Sia natangnga’ dukapa: La tontongpa tu kamarampasan lan mintu’ allo katuoangku.
Iatu tang dipokadannapa tu mintu’ tuna’na Hizkia, sia mintu’ penggauran lalongna, sia umba nakua unggaragai tu limbong sia saruran sia umpatama kota uai, tang tisura’moraka lan sura’ ossoranna mintu’ datu Yehuda?
Iatu Hizkia tamamo batu dilobang dipasola nene’ to dolona. Anna Manasye, anakna muane ussondai dadi datu.